السلام عليكم يا كابتن أحمد ..
عليكم السلام ورحمة الله وبركاته , نخش في الأسئلة علطول عشان عارفين وقتك ضيق بسبب ماتش بكرة مع نادي الكويت الكويتي في مباراة صعبة مع أقوى الأندية الكويتية ..
حدثنا عن أسرتك يا كابتن أحمد وبالاخص اننا بنسمع كلام كتير عن انها اهلاوية صميمة او زملكاوية ..؟؟
أنا من بنها أساسا ووالدي إسمعلاوي جدا ووالدتي مالهاش في الكورة .. ويمكن ده من أهم اسباب لعبي للاسماعيلي لمدة 3 سنوات ونصف ..
أحمد فتحي نجم الاسماعيلي السابق .. مصر كلها استبشرت خير باحترافك في نادي شيفيلد الانجليزي وأفتكر بالذات لقطة دخولك مباراة شيفليد مع ميدو توتنهام وفرحنا جدا بيها ..ياريت نعرف ايه سبب عدم توفيقك في انجلترا وبالاخص ان هناك شائعات كتير عن تسبب ممدوح عباس رئيس نادي الزمالك في هذا الفشل بعلاقته مع رئيس نادي شيفيلد لاجبارك للعودة الى مصر واللعب لصالح الزمالك ؟
نادي شيفيلد لما نزل درجة تانية زي أي فريق بيهبط بيبقى محتاج فلوس ..وممدوح عباس عرض مبلغ مليون جنيه استرليني لشرائي فادارة النادي الانجليزي وافقت لانه مبلغ كويس جدا ..لكن بسبب رفضي للذهاب للزمالك حصل اللي انتوا عارفينه باستبعادي الدائم عن قائمة الفريق ..
لو تفتكر مشكلة شوبير مع ممدوح عباس قيل ان وراءها ان شوبير يعتبر سبب غير مباشر في ذهابك للاهلي ؟
شوف ياسيدي .. ماحدش ليه دخل بذهابي للاهلي الا احمد فتحي ..وهقولك شيء يمكن ماحدش يعرفه ..هو اني قبل كده قعدت مع محمود الخطيب في بيته مع والدي وقلتله اني لو رجعت مصر مش هلعب لاي نادي غير النادي الاهلي ..
طب ليه فضلت الاهلي عن الزمالك أو العودة الى الاسماعيلي ؟
بالرغم من ان العرض المالي اللي قدمه الاهلي اقل بكثير من نادي الزمالك وهو 650 الف جنيه استرليني إلا اني وافقت على الاهلي لانه نادي محترم جدا بيتعامل مع اللاعبين بمنتهى الاحترام وبيدي اللاعبين حقوقها اول بأول واللاعبين كلهم بيحبوا بعض والادارة مستقرة وبتتعامل مع اللاعبين باحترافية .. والوضع في الزمالك زي ما انت عارف لسه الاستقرار فيه مش قوي ... ولسه بيعاني من بعض المشاكل.. أما الاسماعيلي فكان صعب جدا جدا في ظل ظروف الاسماعيلي الحالية انه يدفع مبلغ 675 الف جنيه استرليني عشان كده انا كنت عارف من الاول ان رجوعي تاني للاسماعيلي شيء مستحيل فعليا حتى لو انا اردت ذلك..
بعد التعاقد مع الأهلي تم إعارتك لنادي كاظمة الكويتي بسبب عدم استطاعة قيدك في قائمة الفريق ومن أجل إعدادك بشكل جيد مع نادي خليجي محترم من أجل عودة فتحي سريعاً للياقة المباريات ...تقدر تقيم لنا نسبة نجاحك في نادي كاظمة بعودة أحمد فتحي النجم اللي الجميع بينبهروا بيه ؟
الحمد لله أنا بأدي هنا بشكل جيد والجميع بيشهدولي بالخير وان شاء الله اكون بقيت افضل ..واكيد تجربة الكويت افادتني وهتأهلني بشكل جيد لارجع احمد فتحي اللي الناس عارفاه ..
أنباء كثيرة ترددت عن رغبة رئيس نادي كاظمة الكويتي في تمديد فترة اعارتك لكاظمة الكويتي من النادي الاهلي ..يا ترى احمد فتحي يرغب في ايه؟
نادي كاظمة نادي محترم وسعدت باللعب معاه ..لكن بإذن الله انا راجع على أول يناير ..وده اللي انا اعرفه لحد دلوقتي ..
أنا واحد من الناس اللي طرت من الفرحة بتعاقد الاهلي معاك ..فأنت من أفضل عشرة لاعبين أنجبتهم مصر في العقد الاخير ..وجماهير الاهلي كلها معلقة آمال كبيرة عليك ..فتوعدهم بايه ياكابتن ؟
بإذن الله اكون اضافة للاهلي ..واحاول ابذل اقصى جهدي لاسعادهم وللرد على المشككين في قدرات احمد فتحي او المنتظرين وقوعي وباذن الله اكون عند حسن ظن الجماهير.. وأحب اقول ان الاهلي نادي كبير جدا ..ومابيقفش على أي لاعب ..نجوم راحت ونجوم جت ونجوم هتيجي والاهلي هو اللي عملهم مش هما اللي عملوه وربنا يكرمنا ..
رأيك ايه في مشكلة حسني عبد ربه ؟
مشكلة حسني هي مشكلة قلة موارد الاسماعيلي ..وهو ده السبب الرئيسي في المشكلة .. لو كان الاسماعيلي عنده فلوس كان خلص مع ستراسبورج من زمان ..
تقول ايه لجماهير الاسماعيلي اللي حزينة على عدم رجوعك للنادي مرة اخرى وغاضبة انك ذهبت للاهلي بالذات ؟؟
أحب اقولهم اني بحب الاسماعيلي جدا ..وبحبهم جدا والله .. وهفضل احب الاسماعيلي جدا ..ومش هنسى فضله عليه .. وبرضه احب اقول ان هو ده الاحتراف وكرة القدم هي مصدر رزقي ..وذهابي للاهلي مش معناه كرهي للاسماعيلي او خيانتي ليهم ..لكن زي ماقلتلك هو ده اكل عيشي .. واي مكان اروح فيه العب فيه ..كاظمة الاهلي شيفيلد.. المهم اني اكون مرتاح مع الفريق اللي هروحه ..لكن حب الاسماعيلي سيظل في قلبي ..
احمد فتحي لاعب جوكر يلعب مساك وباك رايت وديفندر ..يا ترى جوزيه متوقعه يلعبك فين ؟
والله انا عن نفسي هموت نفسي في التمرين وهجتهد واحاول اكون في التشكيلة الاساسية .. والمدير الفني هو اللي يقدر يوظفني حسب احتياجات الفريق وامكانياتي ..
أحمد فتحي لماذا لم يلتحق بالمنتخب بالرغم من تألقك في كاظمة الكويتي وبالرغم من حاجة المنتخب لمجهوداتك؟
هو الكابتن شحاتة عمل الدورة العربية لتجربة بعض اللاعبين الجدد ..ولسه لم يعلن القائمة النهائية للمنتخب ..واتمنى اني اكون معاهم ..وربنا يوفقنا..
رؤيتك ايه لمباراة الاهلي والنجم ؟
بصراحة ..انا كنت حاسس ان الاهلي هيخسر..لسببين :
1- ان الاعلام عمل ضغط رهيب على اللاعبين بأن الاهلي خلاص في اليابان وان البطولة حسمت وكده.. ده جعل هناك ضغط رهيب على اعصاب اللاعبين .. واسألني انا .. أنا افتكر ماتش النهائي بتاع الاسماعيلي كنا خسرانين من انييمبا النيجيري في نيجيريا 2/0 والاعلام هنا كله قبل ماتش العودة في مصر بيقول ان الاسماعيلي هيكسب.. ده جعل الضغط رهيب على اعصابنا وخسرنا البطولة للاسف ..
2- فريق النجم فريق تقيل جدا ومش سهل ..ومش حابب اعلق كتير على نقطة الحكم لانه لو تفتكر ماتش انييمبا في مصر كان الحكم ظلمنا اكثر بكثير من العرجون مع الاهلي ..لكن فريق النجم لعب ماتش حلو وادى بشكل جيد ..وطبعا ماتشات النهائي اللي بيستغل فيها الفرص اللي بتجيله هو الكسبان ..
هل ترى فريق الاهلي الحالي قادر على الاستمرار في حصد البطولات القادمة كلها ..أم يجب تدعيم الفريق في أكثر من مركز؟
بص ..في نقطة الناس بتتكلم عنها وهي كبر سن لاعبي الاهلي.. حسام عاشور واينو وتريكة وفلافيو وجلبرتو ومتعب واحمد السيد كلهم شباب لسه في العشرينات .. يعني مش فريق عواجيز واللي حصل ده كبوة وهتعدي وبإذن الله الاهلي قادر على الاستمرار في حصد البطولات واسعاد جماهيره..
ايه هي اخر اخبار صفقات الاهلي ؟
والله انا زيي زيك ..بنقرا جرايد وماعنديش معلومات محددة عن الموضوع ده ..
كلمة اخيرة لجماهير مصر والاهلي ؟
شكرا لكل من دعم أحمد فتحي ووقف الى جانبه ..وان شاء الله لن اخيب ظنهم فيا واكون كفء لتشجيعهم ليا الفترة اللي فاتت ده كلها ..من وراء الكواليس ..
سألنا الكابتن عمرو سماكة عن احتمال عودته للاهلي مرة اخرى ..؟؟
قال والله في كلام كده وربنا يسهل ..
سماكة لاعب طيب جدا وحبوب جدا ومتواضع جدا زي احمد فتحي ..وروحهم حلوة ومحبوبين جدا من بقية زملائهم ..
شهاب كاكولي حارس كاظمة قعد يشتكيلي دكتور الاسنان بتاعه اللي اداله 100 دينار وفي الاخر برده ماعالجهوش ..
احد مشجعي كاظمة الكبار كان يحضر التمرين وتبادلنا اطراف الحديث عن عمرو سماكة وتريكة ..
فقال لي ان عمرو سماكة افضل من تريكة ..وانا قعدت اقوله تريكة الافضل .. لكن فيما يبدو ان عمرو سماكة مدي انطباع جيد هنا في الكويت وربنا يهديه ويوفقه ..
مباراة الغد لنادي كاظمة مع الكويت الكويتي اقوى نادي حاليا في الكويت ..لذلك كان في نوع من القلق واضح على جميع العاملين ولاعبي الفريق والتركيز الشديد من المدرب والاداريين واللاعبين ..
