ثورة غضب في استوديو الأهلي من حسني وعرابي وعبد الرحمن
شهد الاستوديو التحليلي لقناة النادي الأهلي موجة عارمة من الغضب والانتقادات اللاذعة لقطاع الكرة والفريق الأول لكرة القدم، عقب السقوط في فخ التعادل أمام فريق القناة، حيث شنَّ نجوم النادي الكبار عادل عبد الرحمن، وأسامة حسني، وأسامة عرابي هجوماً حاداً على تراجع الأداء وضياع النقاط السهلة في مشوار درع الدوري.
في مستهل تحليله للمباراة، أبدى عادل عبد الرحمن استياءه الشديد من كثرة التعثرات، رافضاً سياسة الاكتفاء بعبارات تحمل المسؤولية الإنشائية: "لأ ما هو إحنا مش طول الوقت هنطلع نبرر ونقول إننا بنتحمل المسؤولية.. ما أكيد المدرب بيتحمل المسؤولية لأنه بيحضر اللعيبة وبيتدرب وبيدربهم وبيعمل كل حاجة، لكن لأ بجد لازم وقفة من المدرب والجهاز الفني، لأن بالشكل ده وفقدان النقاط مش هتاخد الدوري".
وأضاف مشدداً على أهمية حصد نقاط المباريات المتوسطة: "أنت ممكن تتعادل مع بيراميدز وتبقى مقبولة، لكن مش القناة والمقاولون؛ الماتشات دي تضيع دوري.. والجهاز الفني لازم يفهم كويس إننا مش هنعرف نستحمل سنتين نخسر الدوري".
وتابع موجهاً رسالة للاعبي الفريق في ظل الدعم الإداري اللامحدود: "الحاجة دي مجنناني يا أسامة، نعملكم إيه أكتر من كده؟! مش بجامل الإدارة والله، النادي جاب لاعيبة كتير وموفر كل حاجة.. عايزين إيه بجد؟!".
من جانبه، استعرض أسامة حسني حجم الدعم الهائل الذي يوفره النادي للاعبين مقارنة بما يقدمونه داخل المستطيل الأخضر، قائلاً: "حتى يا كابتن عادل، مباراة أوغندا الفريق سافر لها بطائرة خاصة علشان راحة اللاعبين عشان ماتش النهارده! وأنت الماتش اللي فات مريح لعيبة عشان تشوف المردود البدني حتى النهارده، وفي الآخر القناة بدنياً أفضل منك وبيكافح، ونشوف الأداء ده قدام القناة؟! ده فيه فرق تانية مسافرة طيران عادي ومخدوش نفس الراحة اللي خدها لاعيبة الأهلي".
وفي سياق متصل، أكد أسامة عرابي أن الأزمة الحقيقية لا تكمن فقط في النتيجة، بل في افتقاد الروح القتالية المعروفة عن جينات النادي الأهلي: "لا، ده أنت مفروض حتى لو النتيجة مش ماشية معاك، كنا زمان بنشوف الأهلي (بيطلع نار) وقتها.. لكن النهارده مفيش خالص خالص، ومش ده الأهلي".