أحمد بلال : غياب روح لاعبي الأهلي سبب التعادل أمام القناة
شنَّ نجم النادي الأهلي السابق، أحمد بلال، هجوماً حاداً وانتقادات قوية للاعبي الفريق الأول لكرة القدم، وذلك خلال تحليله لأداء الفريق عقب السقوط في فخ التعادل، معتبراً أن النتيجة بمثابة خسارة محققة ونزيف مبكر للنقاط في صراع درع الدوري .
وفي مستهل حديثه عبر شاشة قناة الأهلي، أبدى بلال استيائه الشديد من تراجع الأداء والنتيجة قائلاً: "النهارده تعادل للأهلي بطعم الخسارة! بل بطعم الخسارة وروح الخسارة كمان، الأهلي بيفقد نقطتين مهمين جداً جداً في مشوار لقب بطولة الدوري".
وأضاف محذراً من صعوبة نظام المسابقة هذا الموسم: "عندنا دوري عام السنة دي مختلف شوية؛ بتلعب 25 مباراة فقط، معندكش أريحية إنك تفقد نقاط في البداية، أو إنك يدخل فيك هدف أو هدفين أو 3، أو تلعب مباراة حلوة وأخرى وحشة".
ووجه بلال رسالة مباشرة ومباشرة للاعبي الفريق، لا سيما العناصر الدولية: "بندعم اللاعبين والجهاز الفني والإداري وكل حاجة، ولكن في وقت من الأوقات وأنا الكلام ده بوجهه للاعيبة النادي الأهلي اللي فيهم حوالي 7 أو 8 بيلعبوا في منتخب مصر المدرب بيحط التشكيل ويديك التعليمات، وأنت في الملعب بتعمل إيه؟ فين روحك؟ فين حفاظك وأداؤك وإمكانياتك؟ لعيبة الأهلي النهارده خارج المستوى خالص وكتير لازم تراجع نفسها!".
وتابع منتقدًا غياب الشخصية القيادية داخل المستطيل الأخضر: "فين كباتن الأهلي وأنت مغلوب؟ فين الإصرار والعزيمة يلا بينا نتعادل ونكسب ونجيب تاني وتالت ورابع؟ الحقيقة مشفتش الكلام ده خالص النهارده".
وتساءل نجم الأهلي الأسبق عن سبب تراجع الأداء في ظل الاستقرار الإداري وتوفير كافة الاحتياجات: "لما يكون عندك أحسن سكواد في مصر، وأكبر عدد من اللاعبين في منتخب مصر.. إيه تاني محتاجه؟ مجلس الإدارة وفّر أحسن لعيبة ومدرب كويس وإمكانيات بلا أزمات، وبتلعب في أحسن ملاعب وأجواء، والسبوت الإعلامي عليك كبير وأنت سوبر ستار.. أنت معندكش أي أزمة داخل أو خارج الملعب ومحتاج بس تحط كل تركيزك جوه الجيم!".
وأكد بلال رفضه التام للاكتفاء بتحقيق نتائج في مباريات بعينها: "هل ممكن نقعد على مكسب نادي الزمالك؟ مباراة الزمالك كبيرة طبعًا لكنها بـ3 نقاط زيها زي أي مباراة؛ تعادلت مع الزمالك وكسبت القناة، زي ما كسبت الزمالك وتعادلت مع القناة.. ممكن الروح المعنوية تفرق، لكن مينفعش نكتفي بكده".
واختتم أحمد بلال حديثه بتوجيه رسالة تحذيرية ودعم في نفس الوقت: "كون إنك تلعب في الأهلي أو تستحق تيجي النادي الأهلي، موضوع كبير جداً ومختلف تماماً. إحنا مش عايزين نقسو على اللعيبة ولا الجهاز، بس بنفكركم إن النادي الأهلي في كل بطولة لا يعرف سوى المركز الأول فقط لا غير".