وائل القباني: حسام حسن فرض الانضباط وشخصية المنتخب.. واللاعب المصري يهرب من الالتزام
أدلى نجم نادي الزمالك ومنتخب مصر السابق، وائل القباني، بتصريحات جريئة وصريحة حول أزمة رحيل الجهاز الفني للمنتخب الوطني بقيادة حسام حسن، مسلطاً الضوء على كواليس فرض النظام والسيطرة داخل المعسكرات، وطبيعة عقلية اللاعب المصري في التعامل مع المدرب الصارم.
وفي مستهل حديثه، تساءل القباني عن الدوافع الحقيقية وراء الإطاحة بالتوأم، موضحاً: "من حقي أعرف كابتن حسام مشي ليه؟ هل بسبب فني ولا حاجة بعيد عن الملعب وفي حاجات خارجية كلنا عارفينها لكن ما نقدرش نخوض فيها كتير. لكن أنا بتكلم دلوقتي: إزاي يبقى واحد ناجح عمل شخصية لمنتخب مصر كنا مفتقدنها من فترة طويلة، وإزاي مدرب نجح مع منتخب مصر في كأس العالم من حيث الأداء والسيطرة والشخصية مع اللعيبة."
وعن ردود أفعال بعض اللاعبين وفرحتهم الزائدة خلال المعسكر الحالي تحت قيادة علي ماهر، أبدى القباني استغرابه الشديد، معللاً ذلك بطبيعة اللاعب المحلي:
"أنا مستغرب من فرحتهم الزائدة خلال المعسكر الحالي مع علي ماهر، وده طبيعي لأن مشكلة اللاعب المصري إنه لا يحب الالتزام ولا النظام ولا المحاسبة، ويشتكي ويقولك 'أنا مخنوق' لأنه عايز يعيش حياته براحته، يخرج ويسهر براحته. فلما يلاقى التزام ونظام، يقولك 'أنا مخنوق من المدرب'."
وأضاف حاسماً: "لكن كابتن حسام كان عايز ينجح، علشان كده فرض النظام والالتزام والشخصية القوية. لازم نعرف إن اللاعب لاعب والمدرب مدرب، وما ينفعش حد يتخطى التاني؛ أنا المدرب اللي بقود، مش هنسمح إن لعيبة هي اللي تقود، وما ينفعش المدرب يمشي على هوى اللعيبة".
وفي ختام تصريحاته، حرص نجم الزمالك السابق على توجيه التحية للجهاز السابق وتقديم مساندة كاملة للمنظومة الحالية، مؤكداً: "لازم أشكر كابتن حسام حسن على الفترة اللي فاتت، وفي نفس الوقت بدعم كابتن علي ماهر المدير الفني الجديد لمنتخب مصر. إحنا مش بندعم أشخاص، إحنا بندعم منتخب مصر أياً كان المدرب."
