كيشو .. اللاعب مش ميدالية نحتفل بيها النهارده وننساها بكرة
صرح اللاعب محمد إبراهيم كيشو عبر صفحته علي الفيسبوك بعد واقعة الهروب قائلا :- أنا مش بهاجم حد .. أنا بتكلم عن منظومة وإدارة محتاجة تتطور ، وده لمصلحة المصارعة والكل .
وأضاف كيشو قائلا :- أنا مع اللاعب ومع حقه في التقدير والحماية مش وقت ما يجيب ميدالية فقط ، وأنا واحد من اللاعبين اللي لسه عنده حلم، ولسه ممكن يرجع يكمل طريقه ويوصل لحلمه من جديد .
وأكمل اللاعب قائلا :- اللاعب ممكن يتصاب وهو بيلعب مين يضمن علاجه ومستقبله؟ وممكن يعتزل بعد ما أفنى عمره في اللعبة مين يضمن له حياته؟
عندنا أبطال عالم وأفريقيا خلصوا مشوارهم النهارده من غير وظيفة ، ولا تأمين ، ولا أمان للمستقبل .
واستكمل حديثه :- المصارعة ليها فضل كبير علينا، صنعت أبطال وخلتنا نرفع اسم بلدنا في أكبر المحافل، وفضلها على كل واحد فينا عمره ما يتنسي وعشان كده لازم نحافظ على قيمة البطل ونحترم اللاعب ونأمّن له مستقبله وحياته، لأن اللي ضحى بسنين من عمره عشان اللعبة وبلده يستحق التقدير وفي النهاية أي قرار شخصي من لاعب ماينفعش يكون سبب في تشويه صورة المصارعة أو التقليل من قيمة أبطالها ولا من تاريخ اللعبة .
وأختتم اللاعب قائلا :- اللاعب مش ميدالية نحتفل بيها النهارده وننساها بكرة… اللاعب إنسان ، وله مستقبل لازم يتحسب له من قبل ما يسيب البساط .