ميدو يطالب الزمالك ببيع أحمد فتوح في يناير
أطلق النجم المصري العالمي أحمد حسام "ميدو"، تصريحات نارية وحاسمة عبر برنامجه "أوضة اللبس" على قناة "النهار"، طالب خلالها إدارة نادي الزمالك باتخاذ قرار جريء وصارم بالاستغناء عن خدمات الظهير الأيسر أحمد فتوح خلال فترة الانتقالات الشتوية في يناير المقبل.
وقال ميدو في مستهل حديثه: "أنا شايف، مع الاحترام الكبير لفتوح، إن فتوح لازم يتباع! لازم مجلس إدارة الزمالك مع أول عرض جيد في يناير إنه يتخلص من فتوح، حتى لو ده هيكون ليه تأثيره الفني على الفريق".
واستبق ميدو اعتراضات الجماهير بشأن أزمة إيقاف القيد قائلًا: "وأنتم حضراتكم بتتفرجوا عليا، والزملكاوية بيتفرجوا عليا، هيقولوا ليا: طب إزاي؟ ده إحنا عندنا إيقاف قيد! لكن أنت في مواقف بتاخدها كنادي بترسخ فيها مبادئك.. رقم 2: بتخسر لعيب، بس بتشتري الفرقة! .
وعن البدائل الفنية في حال رحيل اللاعب، أكد ميدو أن الأزمة الفنية غير موجودة من الأساس، موضحاً: "أن من الناحية الفنية، مين طيب يلعب باك ليفت لو فتوح مش موجود؟ عندك الحلول؟ عمر جابر بيعرف يلعب باك ليفت أحسن ما بيعرف يلعب باك رايت على فكرة.. كل المرات اللي شفت فيها عمر جابر بيلعب باك ليفت بيبقى مميز جداً، وعندك أكتر من لعيب يقدر يلعب باك رايت، فالقصة من الناحية الفنية ما فيهاش مشكلة أبدًا".
وانتقد ميدو مستوى فتوح هذا الموسم بالقول: "الحاجة التانية إن مستوى فتوح من بداية الموسم سيئ جداً! فتوح مش قادر يقف على رجله، وفي ماتش الأهلي الأخير كان هيدخل زيزو التاريخ! لا قادر يوصل للثلث الهجومي، ولا قادر يدافع، ولا في الكورة المشتركة قادر إنه ياخدها بيقع في كل كورة مشتركة! فالتأثير الفني بتاع غياب فتوح على الزمالك مش هيبقى مؤثر أوي".
وفيما يخص تخوفات الجماهير من انتقاله للغريم التقليدي، رد ميدو بكل حسم: "وفي مواقف أنت بتاخدها، الناس بيبقى عندها تخوف يقولك: طب ما ممكن يروح الأهلي! طب ما يروح الأهلي، إيه المشكلة بقى بالنسبة لك لو فتوح راح الأهلي؟ ما فيه لعيبة تانية مشيت من الزمالك وراحت الأهلي، والزمالك زي ما هو وماشي زي ما هو، دايمًا هتعرف إنك تلاقي البديل؛ لأن أنت الزمالك!".
واختتم ميدو تصريحاته مؤكداً: "أنا بحب فتوح جداً، وكلنا وقفنا ورا فتوح ودعمناه في مواقف كثيرة جداً، لكن رأيي: فتوح خلاص لازم يمشي من الزمالك، مشواره لازم ينتهي مع الزمالك؛ لأنه تاني، زي ما قلت لحضراتكم، هو مصمم على نفس الطريق، وما بيسمعش لحد حواليه!".