محمود ممدوح يكشف عن مركزه ومثله الأعلى وقصة الهاتريك
وعن بداياته الكروية، كشف محمود ممدوح مهاجم فريق مودرن سبورت عن التحول الذي طرأ على مسيرته قائلاً: "وأنا في الناشئين فضلت 3 سنين بلعب 'سيرد باك'، وبعد كده اتوظفت في مركز رأس الحربة ومشيت معايا. قلت الفرود أحسن من السيرد باك بصراحة، أجيب أجوان أحسن ما أفضل أقطع وأروح وأضرب، وحسيت إن الدفاع مش لايق عليا."
وأشار ممدوح إلى أن نجم الأهلي ومنتخب مصر السابق، عماد متعب، هو مثله الأعلى محلياً، مضيفاً: "أنا بحب متعب جدًّا وكنت بتفرج عليه وأنا صغير. ليه استايل معين وأهداف صعبة، وإن شاء الله أتعلم منه وأجيبها" .
وعن كواليس هدفه المميز في مرمى فريق زد، استعاد اللاعب اللحظة قائلاً: "قبل ماتش زد كنت قاعد بالليل في الأوضة، وتفرجت على هدف كريستيانو رونالدو مع يوفنتوس، وقلت نفسي أجيب جون زي ده. أكيد محدش هيطلع 'الجامب' بتاع رونالدو، بس يبقى قريب منه. وسبحان الله جاتلي الكرة في الماتش تاني يوم، ومترددتش لحظة إني أعملها والحمد لله ربنا كرمني بيها."
وعن شعوره بعد تسجيله أول "هاتريك" في مسيرته خلال مواجهة إنبي، أبدى سعادة بالغة كاشفاً عن كواليس طريفة بعد اللقاء: "ده كان أول هاتريك أجيبه في حياتي وكنت مبسوط جدًّا، وشعور خيالي بالنسبة لي. من كتر فرحتي خدت كورة الهاتريك وحطيتها جنبي على السرير، وقلتلها: إنتِ هتنامي معايا النهارده ومش هتروحي في حتة."
واختتم ممدوح حديثه بالتأكيد على أهدافه للفترة القادمة، قائلاً: "طموحي الفترة الجاية إني أمثل منتخب مصر وأنضم للمنتخب، وإني أزود أهدافي. أنا سجلت 8 أهداف، فليه مجبش 8 زيهم أو 10 كمان؟ وليه ماخدش هداف الدوري؟ عارف إن فيه ناس أحسن مني كتير، لكن بقول لنفسي دايماً إنت أحسن واحد، وده بيديني قوة إني أجيب أكتر وأكتر."
